"Spāka zeimes" Baļtinovā





Maija suokumā, atzeimojūt Boltuo goldauta svātkus i Latgolas dīnu, Baļtinovas vydsškolā nūtyka latgalisks pasuokums „Spāka zeimes”.
Tuo pyrmajā daļā beja tikšonuos ar kinorežisoru, latgalīšu kulturas aktivistu Viesturu Kairišu- „Spāka vuordi”. Viesturs Kairišs runova latgaliski, atguodynojūt latgalīšu volūdas vierteibu, napīcīšameibu dzymtū volūdu saglobuot, atteistiet, lītuot ikdīnā. Jis uzsviere, ka myusdīnuos latgalīšu volūda ir inteligences volūda. Tei beja saruna par myusu identitāti, par vaļsti, par vierteibom. V. Kairišs runova ari par 2017.godā nūtykušū Latgolas kongresu, kod tyka atzeimuota viesturiski svareiguo 1917.goda Latgolas kongresa 100-gade. Jis beja vīns nu golvonajim pārn nūtykušuo kongresa organizatorim i vadeituojim. Kinorežisors runova ari par sovu jaunū filmu „Piļsāta pi upes”, kura byus latgaliski.
Svātku turpynuojumā školas prīškā tyka atkluotas i apdzīduotas „spāka zeimes”- latvīšu rokstu zeimu treis grupas. Tys ir dorbs, kū paveikušas 11.klases jaunītes Egija Ločmele, Māra Laganovska i Elija Logina kūpā ar školuotuoju Lilitu Kūkuoju, sanamūt atbolstu i paleidzeibu ari nu cytim cylvākim. Treis jaunītes, kas dorbojuos interešu izgleiteibas programmā „Esi līderis!” školuotuojas Lilitas vadeibā, projektu konkursā „Es savai videi” esitynova projektu „Spāka zeimes”. Sovu projektu juos prezenteja Reigā i konkursā dabova 2.vītu vaļstī! Atkluošonas svātkūs meitenes i školuotuoja saceja paļdis vysim paleigim. Saulainajā dīnā školas prīškā pi boltim goldautim vysi daleibnīki cīnovuos ar kūpeigu zupu i speciali pasyuteitu svātku torti.
Tagad „spāka zeimes” pi Baļtinovas vydsškolas ik dīnu prīcej i uzrunoj kotru- gon baļtinovīšus, gon ībraukušūs gostus! Paļdis par tū vysim, kas sovu rūku i sirdi dalyka pi ituo dorba! Senejuos tautiskūs rokstu zeimes (taipat kai senejuo latgalīšu/latgaļu volūda) nas myusim godu symtim senu nu senčim montuotu informaceju i dzeives gudreibu. Tikai mes paši laikam eisti naapjādzam itū boguoteibu. Lai „spāka vuordi” i „spāka zeimes” ir kai olūts, kur varam pasmeļt spāku i stypruoki byut- ar sovu identitati, volūdu, kulturu, sovom saknem!


I.Slišāns, Baļtinovas v-školas direktors

"Spāka zeimes" Baļtinovā 0"Spāka zeimes" Baļtinovā 1"Spāka zeimes" Baļtinovā 2"Spāka zeimes" Baļtinovā 3"Spāka zeimes" Baļtinovā 4"Spāka zeimes" Baļtinovā 5"Spāka zeimes" Baļtinovā 6"Spāka zeimes" Baļtinovā 7"Spāka zeimes" Baļtinovā 8"Spāka zeimes" Baļtinovā 9"Spāka zeimes" Baļtinovā 10"Spāka zeimes" Baļtinovā 11"Spāka zeimes" Baļtinovā 12