Latgalīšu volūdas olimpiade i konkurss „Vuolyudzāni”


21. aprelī jau ostiņpadsmitū godu Rēzeknē nūtyka Latgolas regiona latgalīšu volūdas i kulturviestures olimpiade i skotuves runas konkurss „Vuolyudzāni”. Kai kotru godu, tymā pīsadaleja ari baļtinovīši.
Konkursā „Vuolyudzāni” Baļtinovas vydsškolu puorstuovēja Dace Logina (11.kl.), Sonora Logina (7.kl.), Juoņs Logins (4.kl.), Viktorija Oļipova (3.kl.) i Ligita Matule (2.kl.). Paļdis par bārnu gatavuošonu konkursam juosoka školuotuojom Anitai Ločmelei, Rudītei Laganovskai i Irēnai Kašai. Ar vysaugstuokū sasnāgumu vysus īprīcynova Sonora Logina. Sonorai 5.-8.klašu grupā latgalīšu skotuves runā- 1.vīta Latgolā! Viktorijai i Juoņam nadaudz pītryuka da gūdolguotūs vītu, jim- atzineibas, bet Dacei i Ligitai- pateiceibas. Kotrā ziņā prīks par vysim daleibnīkim i sirsneigs paļdis jim! Na kotrs šudin leidz ar latvīšu literarū volūdu var breivi runuot i uzastuot izs skotuves ari latgaliski.
Latgalīšu volūdas i kulturviestures olimpiadē 8 komandu konkurencē Baļtinovas vydsškolas komanda īgiva 3.vītu. Komandā beja 11. klases jaunīši- Ilze Jermacāne, Megija Bukša, Egija Ločmele i Rihards Oļipovs. Sveicīns olimpīšim i paļdis par dorbu, gatavojūtīs olimpiadei!
Vysi daleibnīki i školuotuoji duovonuos sajieme dažaidas gruomotas- „Gostūs pi Boņuka”, „Tāvu zemes kalendaru”, rokstu kruojumu „VIA Latgalica”, žurnala „A12” eksemplarus i.c. Pa munam, uzvarātuoji i īgivieji beja vysi daleibnīki, naatkareigi nu dabuotuos vītas, jo izbaudeja latgaliskū nūskaņu i latgalīšu volūdu, kas skaneja vysu dīnu.
Imants Slišāns, Baļtinovas v-škola

Latgalīšu volūdas olimpiade i konkurss „Vuolyudzāni” 0Latgalīšu volūdas olimpiade i konkurss „Vuolyudzāni” 1