„Vīnuoti, tok na vīnaidi!”


Latgolys Regionaluo televizeja (iz prīšku – LRT) ar Vaļsts regionaluos atteisteibys agenturys finansialu atbolstu, realizejūt mierkprogramys „Regionalūs i vītejūs medeju atbolsta programa” projektu „Mums Latvejā juobyut vīnuotim, bet na vīnaidim”, gatavej 10 raidejumu cyklu „Vīnuoti, tok na vīnaidi!”. Pyrmais raidejums jau 10. oktobrī.
2017. gods paīt Latgolys kongresa symtgadis zeimē. Lai ari 4. pasauļa latgalīšu saīts ir nūtics ituo goda majā, dorba pījimtuos rezolucejis eistynuošonai ir vēļ daudz. Ari vaicuojumu, kas patīši ir steidzams, kas pakuortuots sūļs ekonomiskūs, izgleiteibys i volūdys politikys, kulturys i medeju telpys sakuortuošonys problemu rysynuojumā, ir gona.
LRT pīduovoj 10 raidejumu cyklu „Vīnuoti, tok na vīnaidi!”, kur kūpā ar Latgolys pošvaļdeibu puorstuovim, nūzaru ekspertim, Saīta rezolucejis izpiļdis komitejis i atbiļdeigūs ministreju puorstuovim sprīss par prioritarajim vaicuojumim Latgolys regiona atteisteibā, par atbiļdeibom i atbiļdeigajim, lai īcarātī mozuokī i leluokī mierki suoktu eistynuotīs.
Pyrmajā raidejumā atsavērsim iz Latgolys kongresu 1917. godā i 4. pasauļa latgalīšu saītu 2017. godā. Saprassim, kai obi pasuokumi ir saisteiti i kas pamudynuojs Latgalīšu kulturys bīdreibu reikuot saītus, kuru sastuovdaļa ir ari akademiskys konfereņcis, kongresi jau nu 1992. goda.
Svareigi, ka raidejumūs tiks diskutāts par vysim obūs kongresūs apsprīstajim i rezolucejā īraksteitajim vaicuojumim. Skateituoji aicynuoti atbiļdēt iz raidejumā izskaniejušū vaicuojumu, īgiut bolvys, aktivi komeņtēt voi īsnīgt elektroniski sovus vaicuojumus iz uz e-posta adresi lrt.zinas@inbox.lv, vai arī vītnī Facebook – Reģionālā televīzija.
Raidejumu translēs kotru ūtrū ūtardīni (suocūt ar 10.10.2017.) kanala Re:TV LRT lūgā pļkst. 21:00; gotovī raidejumi tiks publicāti ari kanala LRT sātys lopā www.lrtv.lv i kanala youtube kontā www.youtube.com/user/latgalesregionalatv. Taipat ir paradzāts raidejumu īlikt ari vītnē facebook gon nu LRT konta, gon ari nu raidejuma veiduošanā īsaisteitūs personu privatūs kontu (izmontojūt opceju share nu LRT konta – daleitīs), lai tai sasnāgtu leluoku auditoreju.
Rokstom viesturi kūpā, lai nav juotierej laiks anonimim i bīži viņ populistiskim komentarim socialajūs teiklūs!
Evika Muizniece,
raidejuma veiduotuoja